У Беларусі значна вырас попыт на кітайскія электракары. Спецыялісты ЭЗС папярэджваюць пра магчымыя праблемы з зарадкай
У лютым агульная колькасць зарэгістраваных электрамабіляў у Беларусі перавысіла лічбу ў 2500 адзінак. Асаблівай папулярнасцю ў беларусаў сталі карыстацца бюджэтныя кітайскія электрамабілі, якія працягваюць прыбываць у Беларусі ў вялікай колькасці.
У бліжэйшы час, паводле ацэнак аўтадылераў, у Беларусь прыбудуць некалькі тысяч кітайскіх аўто такіх марак, як BYD, Higer, BAIC, GAC і іншых. Аднак, акрамя прывабнага кошту і разнастайнасці мадэляў, уладальнікі менавіта кітайскіх электрамабіляў сутыкаюцца з нечаканымі цяжкасцямі. Кітайскія электракары маюць сваю спецыфіку і ў некаторых аспектах сур’ёзна адрозніваюцца і ад амерыканскіх, і ад еўрапейскіх аўтамабіляў. Перш за ўсё гэта тычыцца таго, што электракары ў Кітаі маюць уласны зарадны стандарт GB/T, зараднай інфраструктуры для якога ў Беларусі няма. На карце наглядна відаць, што канектары з зарадам еўрапейскага тыпу размешчаны ў краінах Заходняй Еўропы, Аўстраліі, Паўднёвай Амерыкі, некаторых афрыканскіх краінах (на карце пазначана зялёным) і станцыі з такімі канектарамі ўстаноўлены ў тым ліку і ў Беларусі, амерыканскі і азіяцкі кантыненты абсталяваныя канектарамі зусім іншых стандартаў: у Амерыцы прыняты стандарт CCS type 1 (блакітны колер), у Кітаі – GB / T (светла-сіні колер).
У такой сітуацыі на дапамогу аўтаўладальнікам прыходзяць перахаднікі. Аднак з-за таго, што многія кіроўцы карыстаюцца несертыфікаванымі перахаднікамі, пры зарадцы могуць узнікаць сур’ёзныя праблемы: замыканне пры падключэнні да станцыі праз перахаднік можа прывесці да блакавання або нават ўзгарання электрамабіля.
Спецыялісты нацыянальнага аператара сеткі ЭЗС Malanka адзначаюць, што штомесяц у мабільным дадатку рэгіструюцца да 200 новых карыстальнікаў. Штодня на станцыях ажыццяўляецца ў сярэднім 250 зарадных сесій, а за два апошнія месяцы іх агульная колькасць перавысіла 15000 сесій.
Выкарыстанне несертыфікаваных перахаднікоў прыводзіць да таго, што аўтаўладальнік не можа зарадзіцца: з 10 спроб больш за палову аказваюцца няўдалым. Для таго, каб пазбегнуць праблем, спецыялісты рэкамендуюць пераабсталяваць раз’ём на еўрапейскі тып на станцыях тэхабслугоўвання. Кошт пераабсталявання пачынаецца ад 400 USD.
Працэс пераабсталявання канектараў, дазволіць не толькі пазбегнуць праблем з зарадкай на тэрыторыі не толькі Беларусі, але і ў іншых еўрапейскіх краінах, куды электраўладальнікі будуць выязджаць на сваіх аўто.
— У месяц з просьбай пераабсталяваць раз’ём да нас звяртаюцца да 5 кіроўцаў. Высокі кошт пераабсталявання асабліва кітайскіх электрамабіляў абумоўлены тым, што ў “кітайцаў” ёсць асаблівасці праграмнага забеспячэння. Нават калі кіроўцы адразу пасля таго, як купяць электракар, карыстаюцца перахадніком, то праз месяц-другі яны ўсё роўна звяртаюцца з просьбай аб пераабсталяванні, бо ў перахаднікоў шмат праблем пры зарадцы. Некаторыя ЭЗС проста не распазнаюць перахаднікі, што робіць зарадку немагчымай. Таксама пры карыстанні перахаднікамі, высокая верагоднасць памылкі пры зарадцы, калі станцыя проста блакуе электрамабіль. І разблакаваць яго не заўсёды атрымліваецца пры дапамозе адаптараў. Таксама выкарыстанне перахаднікоў накладвае абмежаванне на хуткасць зарада, — удакладняе Яўген Швед, спецыяліст аднаго са сталічных СТА.
Malanka, нацыянальны аператар сеткі ЭЗС, гатовы садзейнічаць электрамабілістам:
— Мы прапануем кіроўцам, якія пераабсталююць раз’ём свайго электракара на еўрапейскі стандарт, падчас куплі і тэст-драйва свайго электракара заехаць на станцыю Malanka. Нашы спецыялісты выдалена прасочаць за працэсам зарадкі вашага электракара і дапамогуць разабрацца з зараднай сэсіяй ад моманту запуску станцыі да моманту поўнай зарадкі батарэі, — тлумачыць начальнік аддзела эксплуатацыі зараднай інфраструктуры ВА “Беларусьнафта” Максім Сусарэнка.
Спецыялісты рэкамендуюць пры куплі электрамабіля пераканацца ў тым, што яго зарадны раз’ём падыходзіць пад станцыі з канектарамі еўрапейскага рэгіёну. У выпадку выкарыстання перахаднікоў, рэкамендуецца пераканацца ў наяўнасці сертыфіката ад вытворцы, які пацвярджае яго працаздольнасць і бяспеку. Калі кіроўца ўсё ж вырашыць пераабсталяваць канектар або пры куплі перахадніка, Malanka рэкамендуе прыехаць на ЭЗС для тэставання і дакладнай налады пераабсталяванага канектара спецыялістамі дыспетчарскага цэнтра Malanka.